Vieiros

Diante do monumento a Alexandre Bóveda na Caeira, en Poio, ten lugar este xoves o acto político do BNG en homenaxe aos mártires galeguistas asasinados na Guerra Civil. Na cerimonia estará tamén o presidente da Fundación Alexandre Bóveda, Fernando Quintela. Ao longo do día, o concello de Pontevedra acolle outros actos, no Pazo da Cultura e no camposanto de San Mauro. Ademais, o escritor Manuel Rivas e a vicepresidenta primeira do Parlamento, Tareixa Paz, lerán un texto diante da imaxe do galeguista na praza de Curros Enríquez. Tamén o Partido Galeguista organizou varias actividades neste día, onde lembran especialmente a Pedro Galán, "mártir das mocidades galeguistas", asasinado en setembro do 1936, ao pouco de cumprir 19 anos.