Vieiros

Quintana espuxo o "respecto a todas as opcións relixiosas" para explicar a súa ausencia do acto institucional da ofrenda ao Apóstolo na catedral, e lembrou ocasións nas que o poder da sociedade civil prevaleceu sobre o relixioso, como na traxedia do Prestige, nas que se puxo de manifesto o "respecto por Galiza" que estes días botaban en falta os compañeiros de goberno do Bloque pola ausencia dos cargos nacionalistas na catedral.

O lema "Somos unha nación" foi o que elixiu o BNG este ano para a súa manifestación e así o recalcou o voceiro nacional, lembrando a "oportunidade histórica" que se presenta este ano coa reforma do estatuto "para cumprir as ilusións de tantas persoas" que ao longo da historia loitaron polo recoñecemento de Galiza como nación, e apelou o PPdeG para "que se sume á maioría social deste país" neste proxecto que cualificou de "ilusionante".

O vicepresidente da Xunta non esqueceu así mesmo facer repaso do ano que leva o BNG por primeira vez no goberno, destacando os avances logrados en materia de benestar social, incentivos da economía e do medio rural, así como a lingua e a cultura, e non faltaron as referencias concretas á Lei de Dependencia, as galescolas ou o Ano da Memoria.

A deputada no Parlamento Galego do BNG Ana Belén Pontón abriu o acto saudando as quince delegacións internacionais convidadas polo BNG apelando á solidariedade entre os pobos, polo que condenou o ataque de Israel sobre o Líbano e pediulle ao Estado español que actúe contra estas e outras vulneracións da legalidade internacional, así como a retirada das tropas de Afganistán. Tamén lembrou que Galiza celebra o Ano da Memoria e fixo un chamamento a non esquecer a nosa historia para non converternos nun país "virtual como Matrix, cuxos habitantes vivían desconectados da realidade".

Pontón, de 29 anos, dedicoulle o final da súa intervención á mocidade galega, cunha mención moi especial a Galiza Nova e ao traballo desenvolvido polas mocidades nacionalistas nos últimos 20 anos, destacando o esforzo que están a facer para sacar adiante de maneira voluntaria "o maior acontecemento festivo e político do país", o Festigal, que se está a desenvolver durante os días 24 e 25 de xullo na capital compostelá.