Vieiros

Esta hipótese tamén a considera o presidente de la Xunta, Emilio Pérez Touriño, quen sinalou na roda de prensa posterior ao Consello da Xunta que este artefacto "cadra con outras explosións previas e sitúase nas vésperas do 25 de xullo", aínda que non dixo máis porque "creo que non é bo, pola miña parte, facer ningunha hipótese nin apreciación adicional".

Touriño púxose en contacto coa Delegación do Goberno, que lle transmitiu unha "mensaxe de control e de tranquilidade á cal me sumo".

Condena do BNG e do PPdeG
O Bloque Nacionalista Galego apurou a "condenar con toda firmeza o atentado" de Sigüeiro "por constituír unha nova mostra dunha violencia irracional que repugna a calquera conciencia humana". Para o BNG "o atentado é especialmente irracional por se producir nas vésperas do Día da Patria Galega 06, a festa cívica de todos os galegos e galegas de boa vontade que pretenden construír unha Galiza pacifista, libre e dona de si".

"Xusto nun momento en que un conflito longamente enquistado como o basco se endereita cara a súa solución por vías pacíficas, democráticas e negociadas, semella especialmente demencial o recurso á violencia nun país, o galego, que sempre repudiou calquer violación dos dereitos humanos máis elementares, a comezar polo dereito á vida e a integridade física", conclúe o comunicado enviado polo BNG.

Pola súa banda o Partido Popular de Galicia tamén quixo condenar o atentado reiterando "que ningunha expresión de forza ten cabida nun sistema democrático", ao tempo que anima á sociedade galega "a non deixarse impresionar por este tipo de sucesos". Asemade indican que o presidente do PPdeG, Alberte Núñez Feijoo, contactou este mediodía cos responsables da empresa Puentes y Calzadas para expresarlles a súa solidariedade e apoio.