Vieiros

A Mocidade pola Normalización Lingüística (organización xuvenil da Mesa), o Sindicato de Estudantes (SE) e os Comités Abertos de Estudantes (CAE) fixeron un chamamento conxunto para que a Consellaría de Educación 'garanta que en ningún instituto de Galiza se vai impartir para o curso próximo menos do 50% do ensino en galego', para garantir que se cumpra unha completa normalización do idioma. Este mínimo do 50% para ESO, bacharelatos e ciclos formativos está estipulado no Plan Xeral de Normalización da Lingua Galega aprobado por unanimidade no Parlamento galego en setembro de 2004. Para o cumprimento desta medida, os asintantes esíxenlle á Xunta que "sexa responsábel".

Estas tres organizacións xuvenís lembran que en Galiza se están a vulnerar os dereitos lingüísticos dos estudantes, como constataron organismos internacionais como o Consello de Europa. Neste sentido, as organizacións que solicitan ese mínimo de aulas en galego fano porque a Inspección Educativa ten o deber de cumprir coas súas obrigas de velar porque os acordos aprobados cheguen a materializarse. Ademais, as institucións teñen a obriga de cumpriren cos tratados internacionais referentes ás cuestións lingüísticas.

A Escola Universitaria de Formación de Profesorado de Lugo tamén demanda a aplicación do Plan para o curso 2005/06. Ao respecto, a xunta deste centro, dependente da Universidade de Santiago, aprobou por unanimidade o documento presentado pola Mesa de que para o curso próximo se aplique o Plan Xeral de Normalización da Lingua Galega no ensino. Entre as medidas que acordaron para garantiren esta aplicación, atópase o escribir á Secretaria Xeral de Política Lingüística e á Conselleira de Educación para lles reclamar que se garantan os mínimos de ensino no noso idioma no curso que vén.