Vieiros

"Hai que atopar unha solución e estou seguro de que a atoparemos, Imaxínanse Pontevedra sen Ence?", así se pronunciaba este xoves o presidente de Ence, José Luís Arregui, quen negou que na estratexia da empresa estea a busca doutra ubicación para a factoría galega e trasladoulles ao goberno autonómico e municipal a responsabilidade de buscaren calquera posíbel emprazamento alternativo para Ence en Galiza. "Xa logo nós estudaremos pros e contras e escolleremos a mellor solución", dixo Arregui.

Ao fío, negou que a Xunta lle propuxera sentar nunha mesa de traballo coas cinco consellarías implicadas na busca de solución para o proxecto, tal e como no seu momento avanzara o propio presidente da Xunta, Emilio Pérez Touriño, quen apuntara que a solución definitiva sairía da xuntanza dos representantes do executivo con sindicatos e cos Concellos de Pontevedra e Marín. Á volta do verán, Ence agarda presentar polo miúdo o plan estratéxico avanzado durante esta última xunta de accionistas, e co que buscará duplicar números a curto prazo. De xeito específico, Arregui referiuse ao tamén polémico proxecto da empresa en Uruguai, iniciativa que cualificou como clave no futuro de Ence.