Vieiros

Homes e mulleres de Galiza que viviron os anos da Segunda República, a Guerra Civil ou que padeceron a represión franquista, asisten este sábado 24 do Auditorio de Santiago de Compostela ao acto de homenaxe organizado pola Asociación para a Recuperación da Memoria Histórica, a Fundación 10 de Marzo, a Sala Nasa e a Burla Negra.

Cando pasaron 75 anos da proclamación da II República e 70 do comezo da Guerra Civil, estes colectivos contribúen a que Compostela sexa durante a próxima semana "capital galega da memoria". O acto central será este sábado, con esa homenaxe, á que se unen escritores como Manuel Rivas e Rosa Aneiros ou actores como Luís Tosar, o grupo Chévere e Quico Cadaval. Aló estarán tamén Marful, Narf ou a Quenlla, entre outros, para poñerlle música ao evento.

Para a semana a Galería Sargadelos acolle o martes 27 a proxección do documental "Muerte en el Valle", coa presencia da directora, Christina M.Hardt; o mércores a presentación do libro "Mala gente que camina", de Benjamín Prado; e o xoves a do Programa Interuniversitario de Investigación "As vítimas, os nomes, as voces e os lugares", coordinado polo profesor da USC Lourenzo Fernández Prieto. Á beira, durante toda a semana haberá proxeccións no Teatro Principal, co ciclo bautizado "Imaxes contra o esquecemento", que inclúe producións como "La memoria es vaga", de Katie Halper; "A cidade da selva", de Pilar Faxil e Helena Villares ou "La guerrilla de la memoria", de Javier Corcuera. O venres 30 e o sábado 1 de xullo, na Sala Nasa celébranse as "Ultranoites da Memoria".