Vieiros

"Este evento serve para darmos a coñecer as potencialidades do país, aumentar a capacidade de negocio das empresas e establecer contactos profesionais, ao tempo que poñermos en valor o traballo dos labregos e gandeiros galegos e os nosos recursos produtivos", louvou na súa intervención o conselleiro de Medio Rural.

Alfredo Suárez Canal destacou as potencialidades desta cita e a necesidade de inserila na estratexia global para o rural galego, baseado "no diálogo permanente co sector agrogandeiro e forestal cara a unha maior rendibilidade e produtividade do rural galego". Nesa liña destacou a aposta pola revitalización das mesas do leite, da carne, do viño ou da madeira, a prol do relanzamento da interlocución entre industria e produtores arredor de metas comúns.

Doutra banda, desde a organización da feira aseguraban que algo máis de cen mil visitantes acudiron ao recinto feiral ao longo de toda a semana e destacaron especialmente o aumento do volume de negocio, prognosticando que as cifras poderían duplicar as de 2005.