Vieiros

Alfredo Rodríguez, alcalde de Nigrán, paralizou a semana pasada a aprobación inicial do PXOM logo das protestas e presións veciñais. Aínda así, os veciños de Nigrán non queren só a rectificación do PXOM se non que agora piden "claridade e transparencia" para que se aclaren os posíbeis delitos urbanísticos denunciados na prensa nos últimos días. No punto de mira, as recualificacións de leiras rústicas nas zonas das Angustias, Ramallosa e Telleira, que aparecen no novo PXOM, un total de 123.000 metros cadrados adquiridos pola sociedade Metrowest Europa S.L., administrada por Carlos Mouriño, actual presidente do Celta de Vigo.

Tal e como apuntaba valminor.info a partires dunha análise de crecemento demográfico, a Xunta considera que o novo PXOM de Nigrán promove vivendas para 30 anos, pese a que o seu horizonte temporal é de 12 anos.

Os veciños tampouco esquecerán o proxecto do campo de golf de Chandebrito. Unha superficie de 800.000 metros cadrados que, segundo as asociacións veciñais, "deixaría o maior patrimonio arqueolóxico protexido de Nigrán, sepultado baixo o green". A xunta sinalou ao respecto que o proxecto carece dun estudio de impacto medio ambiental e paisaxístico.