Vieiros

Representantes das Asociacións de Veciños de Nigrán fixeron público un comunicado de prensa no que lamentan os feitos violentos que se levaron a cabo diante do Concello o pasado venres. Segundo o comunicado, "se o Equipo de Goberno xestionase a tramitación do PXOM dun xeito máis adecuado no se terían producido estes lamentábeis accidentes.

As AAVV tamén aproveitan o comunicado para rexeitar as acusacións do Partido Popular e do Partido Independente de Nigrán que dicían que as súas accións responden a unha manipulación política da oposición. Ao mesmo tempo, agradecen o comportamento dos axentes da Garda Civil, "non así dalgúns axentes da Policía Local, que actuaron dun xeito desproporcionado contra os veciños".

O comunicado agradece tamén a rectificación na súa postura dos tres concelleiros "que ante a reacción veciñal manifestáronse en contra da aprobación inicial do PXOM" e anuncia que os veciños seguirán exercendo o seu dereito a expresar pública e libremente as súas opinións de desacordo co actual plan, co obxectivo de participar na súa elaboración antes da aprobación inicial.