Vieiros

Suárez Canal laiouse este luns de que segundo o modelo impulsado desde o ministerio de Agricultura, Galiza sae especialmente prexudicada do reparto. "Ao igual que o ministerio aceptou outras propostas da Xunta, como a necesidade de eliminar a especulación fixando prezos intervidos para a cota ou a bonificación con recursos públicos da compra destes dereitos para determinadas explotacións, tamén debe asumir os criterios sociais no proceso de reparto", propón o conselleiro de Medio Rural.

"Prexudicarálle ás explotacións galegas e beneficiará as grandes granxas doutras comunidades", avalía o conselleiro. Desde o executivo galego opinan que a proposta actual do goberno español "contribuirá á desaparición da reserva estatal ao facilitar que toda a cota procedente dos plans de abandono se quede no seu territorio de orixe". Ao tempo, critican tamén o propio atraso na tramitación do plan, que en 2005 estaba listo no mes de maio. As alegacións enviadas desde Galiza ao ministerio, inclúen a petición de criterios sociais para o reparto de cota e que "como mínimo o 50% da taxa procedente dos plans de abandono se redistribúa a nivel estatal". Suárez Canal insistiu en que se teñan en conta o peso social do sector leiteiro galego.