Vieiros

O pasado venres centos de veciños congregáronse perante o concello de Nigrán co obxectivo de impedir a toda costa a celebración do pleno onde se ía votar a aprobación inicial do Plan Xeral de Ordenación Municipal. Logo dos duros enfrontamentos entre manifestantes e forzas de seguridade, recollidos polos principais medios de comunicación estatais, e despois da suspensión definitiva da sesión, a aprobación inicial do plan parece estar cada vez máis lonxe.

Aurora Carbajal e Ana María Rial, do Partido Popular e Xosé Comesaña, do Partido Independente de Nigrán, xa anunciaron a súa intención de non votar a favor do plan se antes non se negocia cos colectivos veciñais e se introducen modificacións antes da aprobación inicial. Deste xeito, Alfredo Rodríguez, que ameaza con expulsar do goberno os tres concelleiros, perdería a súa maioría no salón de plenos e veríase na obriga de redactar un novo plan.

Pola súa parte, a coalición popular-independente, condenou os actos violentos do pasado venres e denunciou que PSOE e BNG "manipularon e enganaron" os veciños en contra do goberno e atribuíron o sucedido a unha "trama orquestrada" por parte da oposición.

O contraataque do PSOE e BNG non se fixo esperar e así, os dous partidos xa anunciaron que están a investigar se o goberno municipal ofreceu durante os últimos tres anos información privilexiada a determinados promotores sobre as futuras recualificacións que se contemplan no plan. Así, e segundo informaron os seus respectivos portavoces, David Giráldez e Efrén Juanes, o PSOE e o BNG non dubidarán en enviar á fiscalía as probas que demostren que houbo tráfico de influencias.