Vieiros

Danuta Hübner expresou a súa satisfacción polo que na súa opinión é a convicción do goberno galego sobre a necesidade de mudar o emprego dos fondos europeos, "un cambio de estratexia que amosa que o goberno pensa realmente no futuro", comentou Hübner na Radio Galega, destacando que se traten de impulsar plans para investir máis en educación, en investigación e en innovación.

"A rexión tén un alma universitaria moi forte", dixo detectar, "e gustaríame ver cambios para que os mozos vexan Galiza dun xeito máis atrativo, para que queden e volvan os que están fóra". Á beira destacou que "os empresarios son os que crean crecemento" e indicou que na súa vista destes días que trasladarlle á comunidade empresarial galega que "sen I+D as pemes non poden obter éxitos". "Iso é clave para o desenvolvemento, debe haber un cambio de estratexia", pediu. A comisaria dixo confiar e que Galiza use os fondos "con máis eficacia" e contribúa a consolidar e impulsar as súas potencialidades en función da súa tradición industrial.

O goberno trata coa comisaria a revisión de obxectivos
Durante a súa vista o executivo galego informará a Hübner sobre actuacións realizadas no período anterior e arredor da estratexia para o novo período de chegada de fondos comunitarios. Especialmente, desde a consellaría de Economía destacan o chamado "Marco Estratéxico de Converxencia Económica de Galicia", Mecega, para o periodo 2007-2013, "cuxo proceso de elaboración será comentado coa comisaria". A primeira fase deste plan estará rematada en xullo, e a programación definitiva e actuacións concretas vanse coñecer en outubro.

"Galiza apostará por darlle un impulso á innovación tecnolóxica e de procesos, e por completar a modernización das infraestruturas de transporte e comunicación", comentou en días pasados o conselleiro de Economía. Xosé Ramón Fernández Antonio subñiñou "a inequívoca aposta pola educación e a formación do capital humano como elemento básico para aumentar a competitividade, a produtividade e a internacionalización da nosa economía", destacando que a reorientación na utilización dos fondos comunitarios "primará máis a innovación e o desenvolvemento tecnolóxico".