Vieiros

Vieiros de meu Perfil


Edición xeral

RSS de Edición xeral
1958-1996

Dez anos da morte de Lois Pereiro

Hai hoxe dez anos Lois Pereiro, un dos autores clave da poesía contemporánea galega, morría antes de tempo na Coruña. Con só dous libros publicados, e unha morea de letras espalladas en revistas, fancines, recompilatorios, guións, cancións... é unha das reperencias principais dunha xeración que xuntou, primeiro en Madrid e logo na Coruña, a xente como Manuel Rivas, Xosé Manuel Pereiro e Antón Patiño, que fundaron na capital de España unha revista en galego: Loia. Hoxe tería 48 anos. E ao pasaren dez da súa morte, podería ser xa candidato a homenaxeado do Día das Letras, algo que dende algúns sectores piden para darlle modernidade á efeméride e para recoñecer a obra dun poeta xa clásico a quen paga a pena descubrir.

- 09:17 24/05/2006
Tags:

Lois Pereiro naceu en Monforte en 1958. Con 17 marchou a estudar a Madrid co seu irmán Xosé Manuel. Fixo estudos de tradución e, tal como conta o outro Pereiro nun artigo publicado o pasado 17 de maio en La Vanguardia, sobreviviu traducindo películas e series de televisión, cando había, e cine porno cando non había outra cousa. O espíritu punk estivo presente na súa vida e no seu traballo, como o estivo en toda esa xeración de artistas, músicos, poetas e creadores que viviron intensamente os 80.

Ten dous libros publicados, en Edicións Positivas: Poemas 1981/1991 (1992) e Poesía de amor e enfermidade (1995) e 8 capítulos dunha novela sen acabar, Náufragos do paradiso, que publicou a revista Luzes de Galiza nun dos seus últimos números.

Dedicarlle o Día das Letras a Pereiro non é unha das probabilidades que se agardan da Real Academia Galega, cuxos membros son todos máis vellos do que sería hoxe o poeta, pero si sería unha clara aposta pola literatura galega máis contemporánea e radical. E, como di o escritor e xornalista Jaureguizar, por primeira vez poderíamos ver un dos homenaxeados falándolle á televisión. Na enquisa proposta por Vieiros hai un ano sobre a quen se lle debería dedicar o Día das Letras no 2006, Lois Pereiro gañou con moita diferenza entre os nosos lectores.


4.94/5 (16 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: