Vieiros

"A aposta do Goberno galego pola educación e innovación é decidida e prioritaria" asegurou onte a conselleira Sánchez Piñón na rolda de prensa da presentación da mellora salarial. Segundo Piñón, o acordo acadado non ten precedentes xa que participaron todos os sindicatos con representatividade no ensino e porque afecta a todo o profesorado de ensinanzas non universitarias de Galiza: 32.000 docentes, entre funcionarios de carreira e persoal interino e substituto, e supón un incremento de 150 euros mensuais e de 1.800 euros anuais para todo o persoal docente que imparte ensinanzas distintas das universitarias. Unha vez consolidada a revisión das retribucións, en 2009, suporá un incremento do 6,95% con independencia das subas anuais do IPC. Anxo Louzao, da CIG, destacou que "o acordo que asinamos parécenos aceptábel, razoábel e positivo", xa que "abrangue ao conxunto do profesorado, recoñece uns prazos limitados de dous anos e porque é unha cantidade importante". Ademais, "estamos ante o mellor acordo retributivo dos últimos 16 anos", sinalou, que "desfai a inxustiza de que foramos o profesorado peor pagado do Estado".