Vieiros

Esta quinta xornada de mobilizacións desenvólvese sen incidentes destacábeis, salvo as lóxicas retencións no tráfico causadas pola marcha dos manifestantes ata os xulgados, onde nestes intres agardan a posta en liberdade dos seus compañeiros. Os sindicatos, que esixían como condición para retomar as negociacións a liberación dos detidos, consideran que a carga policial foi "desproporcionada" e por iso pedíronlle explicacións a Delfín Fernández na reunión que mantiveron onte na Subdelegación do Goberno en Pontevedra. CIG, CCOO e UXT, que hoxe convocaron a case 15.000 traballadores do metal diante do Concello de Vigo, esixen polo tanto a dimisión do Subdelegado do Goberno e incluso a da alcaldesa de Vigo, Corina Porro. Os representantes sindicais tamén anunciaron que a convocatoria de folga total do sector para o próximo xoves segue en pé. Este paro afectaría a empresas con convenio propio como Citroën ou Barreras.

Touriño reclama diálogo
O presidente da Xunta, reclamou hoxe "diálogo e responsabilidade" co fin de rematar cos altercados e enfrontamentos provocados pola folga do metal. Logo de intervir nun seminario sobre a Comunidades Autónomas e o Dereito Comunitario co gallo do día de Europa, Touriño, en declaracións aos medios, reclamou "o máximo esforzo de diálogo para encontrar unha saída pactada e concertada do conflito" coa fin de que a cidade de Vigo retome a súa normalidade.

O BNG esixe explicacións e a "depuración de responsabilidades"
A Executiva Nacional do Bloque Nacionalista Galego ven de condenar a carga policial producida onte, lembrando que o método de resolver os conflitos sociais é a negociación non é a "violencia policial". Deste xeito, o BNG expresa o seu apoio aos traballadores en folga e demanda explicacións formais ao Ministerio de Interior así como a "depuración de responsabilidades" nas institucións responsábeis da carga, en referencia a Delegación do Goberno. Nesta mesma liña o deputado do BNG, Bieito Lobeira, preseuntou unha iniciativa parlamentaria na que denunciou a "brutalidade policial" das forzas de seguridade e o feito de que os detidos ficaran máis de oito horas nas dependencias policiais sen acceso ao exercicio do seu dereito a contaren con asistencia letrada. Lobeira quere que se faga pública a información da que dispón a Xunta sobre os enfrontamentos: de quen partiu a decisión da carga policial, se se vai pedir a depuración de responsabilidades e se se vai solicitar, formalmente, explicacións ao Goberno español.