Vieiros

O ministro de Asuntos Exteriores estonio, Urmas Paet, non ocultou a súa ledicia logo de acadar por maioría absoluta no parlamento a ratificación da Constitución Europea. Segundo Paet, "non hai mellor día para adoptar a Constitución que cando se celebra o Día de Europa". Hai 56 anos que Robert Schuman e Jean Monnet propoñían en París crear unha institución europea supranacional que administrase de forma conxunta as materías primas máis importantes da carreira armamentística. Este acordo marcou o inicio da Europa Comunitaria. Foi no Cumio de Milán 1985 cando os xefes de Estado de Goberno decidiron celebrar o 9 de maio como o Día de Europa, que xunto co euro e a bandeira europea, identifican a entidade política da UE.

Pola súa parte, a Fundación Galicia Europa conmemora esta data coa celebración dunha xornada titulada "As Comunidades Autónomas e o Dereito Comunitario" que conta coa presenza de varios expertos e con Emilio Pérez Touriño, presidente da Xunta. O acto, que comezou ás 09:30 horas no Hostal dos Reis Católicos en Santiago, analiza as diferentes cuestións que suscita a aplicación do Dereito Comunitario polas administracións autonómicas, facendo fincapé no traspaso de competencias. Nesta liña, o secretario xeral de Relacións Exteriores, Santiago Gómez-Reino, destacou na inauguración do acto o "impulso modernizador" de Europa sobre a sociedade galega, defendendo a "vixilancia comunitaria" e os "fondos europeos" como xeito de adecuar a comunidade a "estándares esixibles de calquera sociedade madura e adulta"