Vieiros

Desde Adega consideran que a autorización no seu día para a construción desta piscifactoría foi "un trato de favor" a Pescanova que "roza a prevaricación". En representación do colectivo, Daniel López Vispo e Fins Eirexas acusaron ao anterior goberno do PPdeG de "amañar" a lei de costas para facilitar a instalación desta e doutras factorías en solo protexido e pediron que a fiscalía investigue o acontecido.

"A empresa e a anterior Xunta: o anterior Conselleiro de Pesca, Lopez Veiga é parte interesada na empresa de Pescanova, tiña xestionadas axudas europeas para a instalación das granxas de engorde de rodaballo de Touriñan e de Xove. O negocio estaba servido: axudas europeas, compra de terreos case de balde, engano aos veciños con supostos postos de traballo que non son reais, pois se necesita unha certa especialización e ademáis son menos dos que se nos queren presentar...". Así o denuncia Adela Figueroa, presidenta da Asociación para a Defensa Ecolóxica de Galiza, asegurando que veciños de Toruiñán lle venderon as terras a 1 euro/m2 (sobre unha superficie total de 350 mil m2) coa esperanza de teren traballo na planta. "Nós nen sabiamos que isto era Rede Natura", comenta que lle dixo unha das veciñas de Touriñán.

"Eu no me opoño a que unha empresa gañe dividendos e reparta cos seus accionistas. O que é inmoral é que desde os postos de xestión política se beneficien as persoas por información privilexiada, que se destrúan as riquezas naturais dun país para enriquecerse os que xa son ricos dabondo, e que se xogue con os veciños coaccionando e facendo demagoxia cós postos de traballo", denuncia Figueroa. Desde a asociación ecoloxistas animan a Pescanova a que estude as alternativas propostas polo executivo lembrándolle á empresa que existen outras posibilidades e que a piscifactoría pode ser despregada "sen chantaxear nin á Xunta nin aos galegos".