Vieiros

Confirmando a súa intención de repetir nese cargo, Cacharro insistiu na necesidade de que o PPdeG celebre un congreso provincial en Lugo, subliñando que de non facerse en 2006 acumularíanse xa seis anos sen esa cita. Ao respecto da candidatura para a capital luguesa, onde o PPdeG quere presentar ao ex alcalde García Díez, ao que el mesmo se enfrontara, pediu a convocatoria ddunha asemblea local, "equivalente a un congreso" para a constitución de xuntas e comités locais, opción que segundo el xa propuxeran no seu día desde a dirección do partido.

Francisco Cacharro lembrou tamén que a cita das eleccións municipais será "directa ou indirectamente" unha "proba" para o novo presidente do PPdeG, explicando que "a forma en que funcione a organización, as respostas que dea, o programa que ofreza e as iniciativas que presente" serán claves onde Alberte Núñez Feijoo asumirá a "responsabilidade". Sobre a súa propia continuidade á fronte da Deputación e a intención da dirección popular de apartalo, Cacharro opinou que "o concepto de renovación acostuma a ser unha argucia para que unha xente desprace a outra e acceda a determinadas posicións".

Por outro lado, o presidente do PPdeG, Alberte Núñez Feijoo, aproveitou outro foro radiofónico, o de Radio Nacional de España, RNE, para avanzar a súa intención de que os candidatos do partido nas sete grandes cidades galegas se coñezan a finais de xuño, antes de que o PP a nivel estatal inicie ese proceso. Feijoo tamén se referiu á fronte aberta en Lugo para o partido, asegurando que no pulso entre Barreiro e Cacharro será o comité provincial o que decida e faga unha proposta cun resultado que necesariamente asumirá o comité rexional.

• Lugo: factor Orozco