Vieiros

Foran até nove ubicacións diferentes as que a Xunta lle presentara a Pescanova, co obxeto de facilitar o redeseño do proxecto de piscifatoría que ía construírse en Touriñán. Dese abano de novas posibilidades de emprazamento para a planta, os técnicos da empresa, en colaboración cos propios técnicos da consellaría de Pesca, preseleccionaran dúas, as de Punta Morás, no concello de Xove, e a do Penedo do Corvo, en Ribadeo. Así o explicou este xoves o presidente da Xunta, Emilio Pérez Touriño.

Touriño lembrou que logo desa negociación, a empresa xa se comprometera a presentar proxecto cara ao mes de xullo. Nese sentido, e logo da reapertura da presión por parte de Pescanova para que a planta se constrúa na zona protexida de Touriñán, o presidente da Xunta chamou á recuperación do diálogo e subliñou que a instalación deste tipo de fábricas "deben ter sempre en conta as directrices de desenvolvemento ssutentábel marcadas tanto na Axenda de Lisboa como procedentes da propia Unión Europea". Desde a empresa, o seu presidente, Manuel Fernández de Sousa, dicía descoñecer o detalle desas propostas e comentaba que Pescanova xa ten un fábrica en Xove.

Sobre o asunto pronunciárase o deputado popular López Veiga, saíndo en defensa de Pescanova e respondíalle este xoves o deputado socialista Xosé Manuel Lage Tuñas. Segundo Lage, o ex conselleiro "pon intereses exclusivamente persoais por diante dos intereses de todos os cidadáns e criticaba que "algúns posicionamentos empresariais parezan claramente guiados por interferencias de personalidades do PP". O deputado do PSdeG insistiu en que "apoiar e fomentar a produción acuícola en Galiza é perfectamente compatíbel coa posta en valor do patrimonio natural do país".