Vieiros

A proposta acordada recolle que as cotas lácteas procedentes do plano de abandono e as existentes na reserva estatal sexan asignadas entre as explotacións existentes en base a criterios sociais e nese sentido apunta que "para isto deben manterse os criterios de priorización do ano anterior e non restrinxir os posíbeis movementos de cota láctea entre comunidades autónomas".

No mesmo sentido pídese tamén que as transferencias de cota "se xestionen polas administracións públicas para evitar as desviacións e a especulación que o libre mercado ten provocado no sector". Finalmente, o Parlamento galego ínstalle ao executivo galego a que a través da consellaría de Medio Rural lle reclame ao ministero de Agricultura diante do Plano de reestructuración do sector lácteo para 2006 "que se teñan en conta as alegacións presentadas pola Xunta á proposta de borrador do ministerio de Agricultura, Pesca e Alimentación, dado o valor estratéxico que as producións lácteas teñen para o mantemento dun medio rural galego sostible económica e socialmente". A iniciativa foi votada positivamente por PSdeG e BNG, coa abstención dos deputados do PPdeG.