Vieiros

Tal como informa Europa Press, Touriño valorou as xestións levadas a cabo polo ministro Caldera para "abrir un horizonte inmediato para avanzar nesta dirección", coa oferta dun visado de traballo especial que facilita que, logo dun ano de estancia no territorio do Estado, se lles facilite aos netos dos emigrantes as condicións para acceder á nacionalidade.

Segundo o presidente, isto supón un "salto adiante positivo e inmediato" para o colectivo exterior e representa un "camiño de entrada para lograr a nacionalidade, que é o importante".

Feijoo tamén fará as Américas
O presidente do PPdeG, Alberte Núñez Feijóo, viaxará na primeira semana de maio a América para reunirse con emigrantes galegos en Arxentina e Uruguai, tal como prometera cando foi elixido presidente do partido no congreso extraordinario de xaneiro. Feijoo ten previsto pasar antes por Nova York para asistir o 30 de abril ao congreso do PP nos Estados Unidos.

Despois ten a intención de visitar algúns centros da emigración gallega en Arxentina e Uruguai e aproveitar para entrevistarse con dirixentes do PP e afiliados ao partido. Tamén espera poder manter encontros con "algunha autoridade" destes dous países e ademais ofrecer unha conferencia nunha universidade de Bos Aires, dirixida especialmente aos mozos arxentinos e aos descendentes de emigrantes galegos.