Vieiros

"Esperamos que as industrias tomen nota, porque o debate debe continuar", di Senra, que remarca o "interese" das multinacionais en baixar os prezos dos produtos agrarios "para obter e recolocar materia prima". A secretaria xeral do SLG agarda unha asistencia masiva, proporcional "ao éxito das asembleas".

Desde Unións Agrarias, o discurso céntrase nos contrastes entre o discurso oficial da industria láctea, que volve argumentar razóns de mercado para xustificar a baixada, e a conxuntura real dos produtores lácteos: as marxes de beneficio da distribución non minguan e Francia segue introducindo os seus excedentes "xa non sen transparencia, senón coa desculpa da Fenil, que aproveita a situación e sanea contas a costa dos gandeiros", en palabras de Roberto García. Os gandeiros preparan "actos sorpresa" nalgunhas grandes superficies galegas para lembrar que a distribución "non pode seguir utilizando o leite como retrouso publicitario".

Nesta ocasión, a consellaría de Medio Rural non será obxectivo das críticas sindicais, contra a dinámica natural de anteriores lexislaturas. "É normal que non haxa críticas a Medio Rural porque desde o principio mediaron entre a industria e os produtores, implicándose directamente no tema", di Senra.

Medio Rural
O obxectivo do departamento que dirixe Suárez Canal é manter a interlocución entre produtores e industria e seguir convocando a Mesa do Leite. "Traballar para que, no peor dos casos, os prezos en orixe se recuperen no segundo semestre do ano", indican. Mentres, os problemas lácteos séguense acumulando. O plan de reestruturación do sector que prepara o Ministerio para 2006 -a consellaría está a preparar as alegacións- reduce a 40.000 as 163.000 toneladas de cota das que se beneficiou Galiza en 2005, sen permitir o reparto entre autonomías. Só a Federación Nacional de Industrias Lácteas (Fenil) e ASAJA-XXAA se felicitaron pola "liberalización da cota".