Vieiros

"Esa proposta queda deste xeito superada", recoñeceu o conselleiro de Presidencia asinando así a volta ao caixón da iniciativa presentada hai unha semana. O conselleiro asegura que a decisión se toma para evitar "malas interpretacións" e insiste en que a Xunta quere acadar o maior grao de consenso posíbel e a implicación de todos os sectores vencellados.

Diante das protestas, a consellaría promete que a partir de agora ábrese un proceso de convocatoria para os diversos sectores da sociedade de Vigo e a súa área metropolitana, "empresarios, axentes sociais, universidade, movemento asociativo, ámbito da cultura e do pensamento e as institucións". Segundo Méndez Romeu, de aquí en diante "vanse propoñer documentos estratéxicos elaborados por especialistas que permitan recoller as demandas e as propostas dun xeito sistematizado".

As necesidades de transporte, planificación e promoción económica do emprego, a planificación territorial supralocal, problemas medioambientais, cuestións de emerxencia e seguridade e os aspectos vencellados co turismo, lecer e cultura, serán os ámbitos de debate priorizados. "Non existindo condicións nin documentos limitadores previos", di Romeu, vaise a convidar ao achegamento de propostas para que "no momento no que se elabore un proxecto de Lei teña un respaldo parlamentario e institucional que faga doado chegar a unha estrutura metropolitana funcional".

O Bloque gaba o cambio de posición "Rectificar a tempo é de sabios", comentou este venres o voceiro parlamentario do BNG, Carlos Aymerich, sobre a retirada da proposta inicial da consellaría de Presidencia. "Agora será posíbel traballarmos xuntos na liña que o propio BNG xa recomendara", explicou Aymerich, para quen a necesidade de artellar unha área metropolitana no contorno de Vigo é unha urxencia imprescindíbel e "non pode rebaixarse a un simple consorcio".

Aymerich tamén opinou sobre a proposta realizada este xoves por Manuel Soto, do Partido Galeguista, solicitando que Vigo se convirta na quinta provincia de Galiza. O voceiro do Bloque cualificou de "obsoleta" esa idea, lembrando que o BNG vén insistindo en que "as provincias son entidades anacrónicas sen papel relevante" sobre as que os nacionalistas propuxeron en varias ocasións avanzar cara a "súa supresión, porque só serven para duplicar cartos sen beneficios reais para os cidadáns".