Vieiros

"O conselleiro debería iniciar o diálogo coas forzas políticas, con alcaldes, e axentes económicos e sociais, e na maior brevidade posíbel, co obxetivo de impulsar outro borrador que teña o máximo consenso posíbel", afirmou Abel Caballero este mércores en Vigo. Caballero, que lles lembramos que soa coma un dos posíbeis candidatos que o PSdeG estaría considerando para aspirar á alcaldía viguesa, mesmo asegurou que o documento achegado desde a Xunta "quítalle credibilidade á actuación do goberno no contorno de Vigo".

Abel Caballero chegou a asegurar que a posición do presidente da Xunta, Emilio Pérez Touriño, coincide coa súa propia postura sobre este asunto, contribuíndo así a desacreditar o borrador chegado desde a consellaría de Presidencia. O presidente da Autoridade Portuaria comentou que sería "un xesto de boa vontade" que o conselleiro Xosé Luís Méndez Romeu retirase ese documento para deixar o proceso onde estaba. Na súa opinión, a Área Metropolitana de Vigo pode ser "un modelo" para o resto do Estado.