Vieiros

"Se hai unha delegación da Xunta nas outras catro provincias galegas, ten que haber representación oficial aló onde hai máis galegos, na quinta provincia", explicou o presidente da Xunta. Emilio Pérez Touriño lembrou tamén a promesa de creación da figura do Valedor do Emigrante, que este mesmo ano se debaterá no Parlamento da que precisou que se pretende que o novo Estatuto a recolla de xeito específico e anunciou que se creará un rexistro oficial de emigrantes. "Todo galego, viva onde viva, terá dereito en tempo real a acceder á información sobre todos os programas e axudas da Xunta de Galiza", indicou ao respecto da que será a primeira delegación da Xunta no exterior, alén da que, baixo o modelo de Fundación, xa existe en Bruxelas, e da que tamén se anunciara hai pouco a súa reformulación.

O Estatuto, visto desde Bos Aires
"Feitos tan memorábeis e imborrábeis coma o noso himno ou a nosa bandeira foron decididos desde o exterior, motivo polo que á emigración, e a Arxentina de xeito moi especial, debémoslle a nosa identidade como país", afirmou Emilio Pérez Touriño durante a presentación en Bos Aires, no Centro Galiza, da exposición "25 anos de Estatuto de Autonomía". Touriño quixo destacar "o papel da emigración en feitos históricos coma a redacción do vixente Estatuto" e puxo exemplo na "inxente labor a prol do autogoberno galego de figuras literarias como Eduardo Blanco Amor ou Rafael Dieste, activos colaboradores dende a emigración" e insistiu en que o traballo activo a prol de Galiza dos emigrantes deixou "pegada indelébel na formación da identidade de Galiza como país".