Vieiros

"Seguridade vial: accidentes de tráfico con participación da mocidade" era o tema da conferencia este xoves na Coruña de Pere Navarro, diretor xeral de Tráfico. Navarro gabou a próxima introdución do carné por puntos e amosouse favorábel á introdución de limitadores de velocidade, toda vez que o exceso de velocidade é unha das causas habituais de accidentes nas estradas. Tamén destacou o amplo número de accidentes protagonizados por mozos onde se detectou que o condutor consumira alcohol e avanzou que a promoción da figura do conductor alternativo, promovendo que os mozos se turnen ao volante cada fin de semana, será un dos plans a promover pola DXT.

Por outro lado, desde a UXT advertían esta semana que o 24% dos accidentes que se producen en todo o Estado teñen a condutores profesionais entre os seus implicados. Desde a Federación de Transportes deste sindicato, FTCM-UXT, e como parte da campaña "Transporte por estrada: a vida non é unha carga", tratarán por iso de concienciar a empresarios, traballadores e administracións sobre esta situación.

Lembran que estas cifras de sinistralidade superan incluso ás do sector da construción e achegan datos de 2004, ano no que 295 condutores profesionais perderon a vida na estrada, 381 sumando a cifra de acompañantes que morreron, e que incluíndo as vítimas dos outros coches implicados nos accidentes suma 733 persoas falecidas ao cabo do ano.