Vieiros

"Poderanse usar as variantes que se vaian construíndo co obxetivo de sacarlle rendabilidade social ao proxecto desde o primeiro momento". Así o aseguraba Emilio Pérez Touriño este mércores no Parlamento, confirmando o paradoxal proxecto que Fomento ten para traer o novo tren a Galiza. Xa que logo, o treito da alta velocidade que virá de Lubián até as proximidades de Ourense está proxectado agora en dúas fases de xeito que na primeira só se construiría unha vía, cun investimento de 810 millóns de euros, de forma que a vía dobre só se despregaría na parte final entre Taboadela e a propia capital ourensá, proxecto de 790 millóns para o que en todo caso non hai prazo fixado. Para a ampliación da liña de Ourense ata Vigo non houbo referencia ningunha.

Segundo o presidente da Xunta, o adiamento nos prazos débese aos atrasos que acumulara o goberno do PP, citando especialmente o tarde que se aprobou o estudo informativo para a infraestrutura ferroviara, a finais de 2003. Ao tempo, lembrou tamén o retraso no envío desde o ministerio de Medio Ambiente da declaración de impacto ambiental. "Transcorreron tres anos completos, ata decembro de 2003 para aprobar o mencionado estudo. Vostede e o goberno amigo malgastaron tres anos para facer un estudo. Iso está no BOE, está documentado e é a súa mellor contribución, co Prestige e co Plan Galicia, á realización do Ave", retrucoulle Touriño ás críticas de Alberte Núñez Feijoo.

No mesmo sentido se pronunciou este xoves no Senado a ministra de Fomento, Magdalena Álvarez, en resposta á pregunta de Francisco Jorquera, senador do BNG. Jorquera reprochoulle que se incumprise co investimento dos dous millóns de euros para o treito de 104 km entre Lubián e Ourense, partida acordada nas negociacións entre o BNG e o PSOE para conseguir o voto positivo dos nacionalistas galegos aos orzamentos xerais do Estado. O senador galego denunciou "a vulneración do acordo" ao constatarse que "o 85% deste investimento vai repercutir fóra do territorio galego" e lembroulle á ministra que esa cantidade fora xustamente a fixada para garantir todos os trámites técnicos e administrativos necesarios, incluíndo a requerida declaración de impacto ambiental "da cal aínda nada sabemos".