Vieiros

"O modelo de cooperación intelixente está dando os primeiros froitos, e sobre todo se o comparamos coa estratexia de confrontación estéril que practicaba o anterior goberno galego que serviu para dar máis titulares pero deu menos acordos e solucións". Así o asegurou o vicepresidente da Xunta, ao tempo que anunciaba a xuntanza para o próximo día 21 de marzo do pleno da Comisión Mixta de Transferencias, onde se deberían asinar co ministro de Administracións Públicas, Jordi Sevilla, os primeiros traspasos de competencias pendentes.

Anxo Quintana insistiu así nas vías abertas para a negociación, destacando especialmente a posibilidade da reactivación da chamada comisión bilateral de cooperación, ferramenta a xeito na súa opinión para encarreirar a negociación "de ti a ti" que co goberno español promove o BNG desde o bipartito. Nese sentido, Quintana propón que desde a Xunta se estableza un proceso de avaliación a nivel de todos os departamentos que permita cuantificar ese "défice estrutural acumulado" para pasar a reclamarllo directamente ao Estado.

De xeito concreto, Vicepresidencia anunciou que este mes comeza a traballar a comisión bilateral de cooperación en materia de seguridade marítima e o proceso de traspaso do Parque Nacional das Illas Atlánticas, así como das funcións e servizos en materia de asistencia sanitaria aos estudantes e a transferencia do Instituto Social da Mariña.