Vieiros

A proposta que aprobaron os grupos parlamentarios é o primeiro paso para unha rehabilitación da figura de Alexandre Bóveda que incluirá a anulación do consello de guerra ao que o galeguista fora sometido. O texto facía mención tamén á necesidade de que o goberno español adoptase as medidas necesarias para, en colaboración coa Xunta, recuperar a memoria histórica democrática coa fin de proceder á rehabilitación e recoñecimento das vítimas da represión polo levantamento militar franquista do ano 36".

O deputado do BNG Francisco Rodríguez, quen defendeu a proposta no Congreso, salientou a "importancia histórica da figura de Bóveda: todo un símbolo para os galegos e galegas". Rodríguez lembrou que Bóveda estudioso da economía fiscal e redactor do Estatuto de Galiza no ano 1932, foi "defensor do texto estatutario diante dos concellos galegos, e promotor do Partido Galeguista, un home necesario nese momento histórico, xoven, sen cargos institucionais, progresista e nacionalista". Ao fío, lembroulle aos deputados populares que Bóveda foi redactor do Estatuto de Galiza, "moitas veces en compañía de Raxoi o avó do presidente do PP, Rajoy".

"Recuperar a memoria dignifícanos", subliñou ao respecto Ceferino Díaz, deputado galego do PSOE, na súa intervención en apoio da petición, destacando que o seu grupo parlamentario traballará por "reconstruír o destruído". "Hoxe están aquí presentes o catalanismo e o galeguismo e o Estado español terá que aceptalo finalmente", afirmou Joan Tardá, representante de Esquerra, que tamén fotou en favor.

Po outro lado, Julio Padilla, deputado do PP, xustificou as abstencións e votos en contra do seu grupo na denuncia de "certa nostalxia guerracivilista". Paradoxalmente incluíu na súa intervención a afirmación de que "tamén nós poderiamos falar de moitas cousas" referíndose a continuación aos fusilados no castelo de Montjuic ou ao pai dun deputado do PP "asasinado por pertencer á CEDA".