Vieiros

En ampla maioría, os galegos tamén se manifestaron a prol de que o goberno autonómico poida intervir nos temas europeos que lle afecten máis directamente. E por outra parte, destaca a indiferencia e o descoñecemento fronte á posibilidade de que Galiza conte cunha Axencia Tributaria propia, posibilidade sobre o que a maioría dos enquisados ou non sabe ou non contesta.

A maioría dos galegos está a prol de reformar a Constitución, un 43.1%, fronte a un 37.5% que prefiren deixala como está. E nese proceso, a reforma dos estatutos de autonomía e a sucesión da Coroa son os puntos principais onde din que lle hai que meter man ao texto constitucional, aparecendo tamén destacados aínda que a máis distancia a garantía dos dereitos sociais, o sistema de xustiza e o fomento da igualdade das mulleres, como prioridades a introducir na reforma da Constitución.

Sobre posíbeis alternativas á organización do Estado, un 63.5% prefire un Estado con comunidades autónomas semellantes ás actuais, por un 22.9% que se manifesta en favor dun modelo con máis autogoberno. A avaliación do sistema autonómico é positiva nun 69.1% dos casos, cun 58.9% que considera positivamente que contribuíron a achegar a xestión dos asuntos públicos aos cidadáns, aínda que un 42.1% que está moi ou bastante de acordo coa afirmación de que contribuíron a aumentar o gasto público sen mellorar os servizos públicos.

Sobre o escenario cara á reforma, un 56.8% afirma que é mellor non facela se non se consegue un apoio amplo no Parlamento e un 17.7% que é importante facela, aínda no caso de que algún partido se opoña. De paso, o CIS preguntoulle aos galegos polas reformas dos estatutos valenciano e catalán. No caso do texto que o Parlamento valenciano mandou ao Congreso, un 90.4% afirma estar pouco ou nada informado. Do mesmo xeito se pronuncian os galegos sobre o texto da reforma estatutaria para Cataluña, do que malia as rifas con ampla repercusión mediática, sobre o proxecto en concreto, un 78% dos galegos recoñecen estar pouco ou nada informados.

O CIS deulle ao escoller tamén aos enquisados entre dúas definicións posíbeis de Galiza: un 74.6% escolleu "rexión", por un 17% que prefiriu "nación". Doutra banda, para referirse a España, un 51.2% escolleron "país", por un 17.8% que dixo "nación" ou un 15.3% que se decantou por "Estado do que son cidadán" e un 14.4% que seleccionou a opción "Estado formado por varias nacionalidades e rexións".