Vieiros

"Declaro tres días de dó coa esperanza de que o noso heroico pobo consiga a unidade islámica e a unidade de Iraq", afirmou o primeiro ministro iraquí Ibrahim al-Iafari. Polo momento, ningún grupo reclamou a colocación do explosivos na mesquita xií de Askari, en Samarra, pero na última hora chega noticia das primeiras detencións polo presunto vencello con ese ataque.

A situación creada puxo en risco de guerra civil ao país impulsando un regueiro de enfrontamentos entre as comunidades xií e suní por todo Iraq. Un amplo número de mesquitas sunís foron atacadas nas últimas horas, causando a morte de ducias de persoas, tres cregos incluídos. O comité de Ulemas suní condenou o ataque á mesquita xií, cualifincándoo de "criminal" e pola outra banda, cregos xiís coma o líder relixioso Muqtada al-Sadr pedíronlle á súa comunidade que se manifeste pacificamente e evite accións de vinganza contra a comunidade suní. Así e todo, a violencia segue sendo protagonista e as últimas novas falan, só en Bagdad, de 47 mortos.

Recomendámoslles seguir a última hora na CNN e en Al Iasira.