Vieiros

"Falamos hai quince días co PPdeG e aseguráronnos que compartían a filosofía da Iniciativa Popular en Defensa dos Ríos, malia que aínda non tiñan tomada a decisión sobre a posición que manterían no debate parlamentario", conta Xan Louzao, voceiro da Coordenadora Galega en Defensa dos Ríos. Desde a comisión promotora da Iniciativa, subliñan que este partido "dera a entender que ía votar a favor" e ven nesta viraxe na postura do PP a implícita crítica que a Iniciativa trae contra as insuficientes políticas aplicadas polos executivos de Manuel Fraga. "Seguen no monte", láianse os ecoloxistas criticando a renuncia ao diálogo do PPdeG.

Ao respecto, Louzao considera que o PPdeG podería actuar "con máis tacto" logo das evidencias e probas que veñen coñecéndose nos últimos tempos, especialmente no ámbito das concesións hidroeléctricas, sobre as irregularidades facilitadas polo anterior goberno. Consideran así que o partido liderado por Núñez Feijoo "non quere cambiar cos tempos" e que perdeu unha excelente oportunidade para facilitar o consenso parlamentario arredor dunha iniciativa clave para o contorno natural galego. Por outro lado, gaban a postura construtiva de PSdeG e BNG, así como a promesa de "non desvirtuar a filosofía do texto" no proceso que agora se abre para a redacción final da lei e destacan que socialistas e nacionalistas aceptasen que a comisión promotora da Iniciativa sexa "parte activa" neste proceso e poida facer as súas achegas e propostas durante o deseño do novo marco lexislativo.

O PPdeG cualifica de "redundante" a proposta
"Carece de lóxica regular aspectos que xa están absolutamente lexislados e previstos para toda Europa", afirmou na súa intervención Xaime Castiñeiras, voceiro de Medio Ambiente do Partido Popular, "unha norma adicional suporía tan só aumentar a complexidade lexislativa, que dificultaría a realización de actuacións e medidas concretas".

O PPdeG tamén considera que "a hipotética derrogación do Plano Sectorial Hidroeléctrico, sen aprobar ningún plan alternativo, conduciría a unha desregulación de tal calibre que, desde o punto de vista legal, sería posíbel desenvolver calquera tipo de actuación sen limitación de ningunha clase", malia que Castiñeiras dixo que o seu partido aceptaría negociar un novo plan sectorial, "no canto de derrogar o existente".

Comentou tamén o voceiro de Ambiente do PPdeG que a propia iniciativa "recoñece que moitos dos problemas que denuncia esta proposta débense a incumprimentos da lexislación existente" e insistiu en que "gran parte deses aspectos xa están regulados no ámbito europeo a través da Directiva Marcoa da Auga", que na opinión do grupo parlamentario do PPdeG "fixa claramente os obxectivos da política ambiental a acadar".