Vieiros

Segundo La Vanguardia, o Executivo e o entorno aberzale xa definiron "perfectamente" os seus plans e cálculos para abordar, partindo do anuncio da fin da violencia, o eventual inicio dun proceso de paz. O anuncio do cesamento de fogo "será máis pronto que tarde", din.

O xornal máis vendido de Cataluña asegura que sectores da Igrexa española, "incluíndo a Ricardo Blázquez", presidente da Conferencia Episcopal, debaten o seu apoio ao proceso de paz.

O Gobierno "espera de xeito inminente un pronunciamento da banda claro e inequívoco no que prometa acatar sen interferencias os acordos que sobre o marco político de Euscadi acaden as forzas vascas", di El Periódico.

Na mesa bilateral Goberno-ETA que se abriría entón, a negociación incluiría aos militantes fuxidos, as familias e os presos. Na segunda, á marxe da anterior, os partidos vascos, incluída Batasuna ou a forza política que a suceda antes das municipais de 2007, debatiríase o novo "marco político-xurídico" para Euscadi.

El País, El Correo Español e o Diario Vasco coinciden en destacar a proliferación de comunicados de apoio na procura dun final dialogado do conflito.

Gara, que recolle as palabras do voceiro de Batasuna, Arnaldo Otegi, sinala que o obxectivo do proceso de paz é "acordar entre todos cales son as fórmulas para que os vascos decidan o seu futuro. Fraco favor lle fai ao proceso quen queira marear o peixe". Haberá resposta de Batasuna ao documento que lle trasladou o PSE, en relación cunha futura mesa de partidos, a semana que vén.

O lehendakari Ibarretxe, pola súa banda, vén de reiterar en rolda de prensa a súa mensaxe de "prudencia", anque insistiu en que a oportunidade da paz "vaise dar. Hai que estar preparados para as cousas boas". Ibarretxe lembrou tamén que o proceso de paz "aínda non comezou".