Vieiros

John Bellinger, voceiro do goberno estadounidense, asegurou logo de facérense públicas estas imaxes que documentan os abusos sobre presos iraquís no cárcere de Abú Ghraib cometidos por soldados dos EUA que eses documentos non se fixeran públicos "en consideración aos dereitos dos propios presos a non seren amosados publicamente". Un representante do exército USA en Iraq insistiu este mércores en que esa imaxes de 2003 "non reflicten a situación actual no cárcere". "É desafortunado que se difundan en momentos nos que só contribúen a acender o lume da opinión pública en todo o mundo", laiouse Bellinger.

Nove soldados foran condenados no proceso posterior á difusión das primeiras imaxes coñecidas sobre os abusos cometidos nesta prisión iraquí. A soldado Linddie England e seu mozo, o cabo Charles Graner, que protagonizan a práctica da tortura na maioría das novas imaxes publicadas, cumpren xa penas no cárcere por período de tres e dez anos respectivamente. A daquela directora da prisión, Ianis Karpinski, fora degradada e o tribunal militar condenouna por neglixencia no seu labor.