Edición xeral
Abre a campaña de limpeza dos montes
Preto dun milleiro de operarios son despregados este luns en grupos forestais no inicio da campaña de prevención dos incendios e do dispositivo de limpeza das zonas forestais. Diante do agoiro dun verán seco, a consellaría de Medio Rural adiantou o labor preventivo, especialmente nas áreas determinadas de vixiancia especial polo elevado risco de sufriren lumes. Ademais, durante este mes coñeceranse os detalles dun decreto sobre masas forestais e áreas agrarias.
Máis de 1.500 axentes forestais limparán os montes galegos até setembro. Seiscentos novos operarios, xeralmente fixos discontinuos, permanecerán activos até que remate o verán. Medio Rural prepara tamén un decreto que obrigará os concellos a manter limpa un área de 25 metros arredor das vivendas situadas onda zonas forestais (ampliable a 100 se converxen depósitos e outras instalacións de risco).
En palabras do director xeral de Montes, Alberte Blanco: "É mellor gastar máis diñeiro en labores de vixilancia e de prevención, que en apagar os lumes". Suárez Canal anunciou que este mes coñeceremos "o potente dispositivo" de prevención de incendios forestais, "con actuacións de tipo normativo, de limpeza e de valorización do monte en colaboración cos concellos".
A consellaría presentoulle á Federación Galega de Municipios e Provincias unha proposta de colaboración en tarefas de prevención de lumes, que abrangue o deseño de medidas xerais e a propia identificación das áreas concretas onde se avalía máis necesario traballo dos grupos forestais.
Sen comentarios
Novo comentario
Se xa tes o teu nome en Vieiros, podes acceder dende aquí:
Máis Alá, Fwwwrando, Galego.org, GZ-Deportiva, Canal Verde, Lusofonía, Irimia, Cartafol, Murguía
RSS
| Que é Vieiros?
| Que é o RSS?
| Creative Commons
| Publicidade
| Director
| O equipo
| Contacto