Vieiros

A consellaría reparou especialmente neste último estudo na relación entre o tipo de contrato e o número de accidentes de traballo. Así, do total de accidentes un total de 21.509 sufríronnos traballadores indefinidos, mentres que os temporais padeceron 26.250. Á beira da alta taxa de temporalidade en Galiza, 34.9%, a administración subliña que "o índice de incidencia, que relaciona o número de accidentes coa poboación exposta, dos traballadores temporais é mais do dobre que o dos indefinidos de xeito que por cada accidente que sofre un traballador indefinido hai 2,3 que sufre un traballador temporal". Segundo explicou a directora xeral de Relacións Laborais, Pilar Cancela, "un traballador con contrato indefinido ten a probabilidade de sufrir un accidente laboral en 25 anos e no caso dos temporais esa probabilidade é dun sinistro en tan só 11 anos".

Por provincias, Pontevedra, rexistrou o maior número de accidentes, 19.987, e Ourense a menor cifra, con 4.001, malia incrementarse o total nun 2.25% respecto ao ano anterior. En canto a sectores, servizos acumula o maior número de accidentes laborais , 16.550, incremento respecto ao ano anterior do 3.16%. Así e todo, na construción é onde houbo a maior cantidade de accidentes cualificados coma "graves", un total de 276. Os accidentes mortais repartíronse do seguinte xeito: 29 no sector industrial; 27 na construción; 29 no sector servizos; un no agro e 17 no mar.

Cancela lembrou que a consellaría vai poñer en marcha un Plan Estratéxico en Seguridade e Saúde Laboral e "un organismo autónomo con entidade xurídica propia, coparticipado pola Administración e os axentes económicos e sociais".