Vieiros

"Pode habelas ou non", lembrou o conselleiro de Presidencia ao respecto das deputacións provinciais. Méndez Romeu aproveitaba así a súa comparecencia para tirarlle das orellas aos mandatarios provinciais que, agás o socialista coruñés Moreda, rexeitaron comparecer hai pouco no Parlamento galego para explicaren a actividade das institucións que presiden.

No momento máis belixerante do seu discurso, Romeu acusou ás deputacións de ter amosado a súa ineficacia diante de temas serios e fronte a emerxencias e infraestruturas clave para moitos municipios que lles correspondía ter atendido. Segundo o conselleiro, á vista desa "evasión de responsabilidades" das deputacións, é lícito poñer en cuestión o seu futuro. "Imos tapar os ollos de xeito permanente diante disto?", preguntou Méndez Romeu. Foi nese sentido que o conselleiro de Presidencia subliñou a necesidade do impulso doutras unidades supralocais para a xestión de servizos.

Méndez Romeu defende o agrupamento de concellos e o impulso de grande áreas urbanas
Xosé Luís Méndez Romeu, conselleiro da Presidencia, defendeu tamén a necesidade de reformar a Lei de réxime local durante a súa comparecencia parlamentaria. Méndez Romeu subliñou que os criterios reitores deste pacto son a cooperación, a participación conxunta en competencias e a suficiencia financeira; e entende que para afondar no modelo de "municipalismo do século XXI" que inspira o Pacto Local é necesario mudar a Lei de Réxime Local e desenvolver novas fórmulas supramunicipais para atender a prestación de servizos nas grandes áreas urbanas.

Os obxectivos da reforma municipalista proposta por Méndez Romeu son garantir "unha estrutura de goberno máis aberta" e unha xestión máis transparente no tocante ao rigor contábel e a execución orzamental, atendendo as recomendacións realizadas polo Consello de Contas. Asemade, a nova lei enfrontará a necesidade de definir un marco laboral compartido por todos concellos de Galicia que faga posíbel "unha progresiva homologación entre as distintas administracións e que favoreza a mobilidade dos traballadores do sector público".

O conselleiro reiterou o compromiso do executivo galego a prol de favorecer o agrupamento dos concellos, co obxectivo de que aúnen recursos que permitan acrecentar a cobertura e calidade dos servizos prestados no referido ao desenvolvemento territorial, o urbanismo, a protección ambiental e a posta en valor do patrimonio histórico-artístico. Segundo Méndez Romeu, o novo municipalismo debe camiñar "cara a integración dos esforzos económicos, sociais e culturais e de todo tipo, nun planeamento común ao servizo de programas estratéxicos de desenvolvemento local".

A xestión de servizos urbanísticos, ambientais e patrimonias a través de instancias supralocais nas grandes áreas urbanas, baixo a fómula de consorcios ou outras semellantes, foi sinalada por Méndez Romeu como un obxectivo estratéxico da súa proposta de reforma. En opinión do conselleiro, serán "entes metropolitanos que axuden a outras administracións e aos poderes económicos e sociais a deseñar proxectos de futuro nas grandes áreas urbanas, que axuden a planificar os usos do territorio".