Vieiros

O conselleiro de Medio Ambiente, Manuel Vázquez, relatou que se esgotarán todas as vías para tratar de frear todos os proxectos, aínda recoñecendo que será difícil que non entren en funcionamento os 16 saltos eléctricos que xa iniciaron obras. Para os outros 33 explicou que a consellaría estuda varias posibilidades, que inclúen o establecemento de axudas ás empresas concesionarias para a mellora das instalacións das que xa dispoñan noutros lugares. Vázquez insistiu ademais en que as empresas deben ser conscientes de que a rendabilidade de moitas das licencias de minicentrais outorgadas é moi pequena, máis aínda comparada co volume dos danos ambientais que causarían.

Medio Ambiente tamén cavila dialogar coa consellaría de Industria ao respecto da posibilidade de que as empresas que renuncien ás licencias para minicentrais poidan logo ser privilexiadas á hora de optaren a licencias para parques eólicos. Manuel Vázquez subliñou que "Galiza xa é un país excedentario en produción de enerxía" e laiouse de que "boa parte das concas hidrográficas están sobreexplotadas". O conselleiro detallou que na actualidade están activas 64 centrais eléctricas no paí, explotadas por 59 empresas, e hai 49 outorgadas que aínda non están en funcionamento. Vázquez lembrou ademais que a consellaría suspendera 24 expedientes correspondentes a novas solicitudes e 9 de ampliación.