Vieiros

A aplicación desta moratoria supón que non se admitirán a trámite novas solicitudes de instalación de parques eólicos nas zonas que abranguen a Rede Natura 2000, que inclúe 59 Lugares de Importancia Comunitaria e 14 Zonas de Especial Protección de Aves; o Parque Nacional Illas Atlánticas; 6 parques naturais; 5 humedais e 5 monumentos naturais.

Na análise presentada polo conselleiro Manuel Vázquez destácase a necesidade da "reflexión e debate social e político que ofrece a próxima revisión do Plan Eólico, que deberá definir con claridade as zonas de idoneidade medioambiental para a instalación de novos parque eólicos e as posibles medidas compensatorias para as zonas de exclusión".

Escaseza de protección de espazos
Paradoxalmente, as propias eivas na protección de espazos naturais en Galiza foron expostas como argumento no informe presentado no Consello da Xunta pola consellaría de Medio Ambiente. O documento recoñece que as zonas baixo algunha forma de protección "apenas cobren o 12% do territorio da comunidade autónoma", apuntando ao respecto que "só Melilla tén menos superficie protexida que Galiza".

Desde Medio Ambiente opinan que a exclusión dese 12% do territorio galego "non debe ser en ningún caso un factor limitador para o desenvolvemento desta fonte de enerxía "pola que o actual Goberno galego aposta de xeito firme e decidido sempre e cando o seu desenvolvemento sexa racional e baixo criterios de sustentabilidade".