Vieiros

O propio presidente da Xunta, Emilio Pérez Touriño, destacara a importancia do novo tren da Eurorrexión como clave para o futuro do Eixo Atlántico. Pola súa beira, o alcalde de Santiago de Compostela, Xosé Sánchez Bugallo, criticou que "adiar esta obra é un cambio substancial no proxecto de futuro da eurorrexión", e aínda subliñando que "é unha lexítima decisión do goberno de Portugal" advertiu que "todos os prognósticos de crecemento económico e a estratexia conxunta de desenvolvemento serán revisados agora á baixa". Mentres, a alcaldesa de Vigo, Corina Porro, estendeu esa preocupación cara ao goberno español, laiándose de que non se reclamasen aínda á Unión Europea fondos para financiar ese proxecto.

Compromiso coa "Constitución do Desenvolvemento Sustentábel"
Redactada a mediados dos 90 na cidade danesa de Aalborg durante a Conferencia Europea de Cidades Suistentábeis, a "Carta Aalborg" que agora asinan as 18 cidades do Eixo Atlántico, compromete aos seus gobernos locais coa aplicación de todo tipo de políticas a prol de modelos alternativos de desenvolvemento. O abano inclúe desde a recuperación de espazos degradados até a promoción de enerxías renovábeis ou a xeración das condicións necesarias para frear a especulación urbanística e obstaculizar a destrución da paisaxe, ademais do fomento de usos racionais do solo. Segundo o presidente da Xunta, a sinatura desta declaración de intencións axudará a "xerar un comportamento responsábel en materia ambiental dentro destas urbes, así como a preservar os seus recursos naturais".