Vieiros

O conselleiro lembrou que a taxa de temporalidade chegou en 2004 ao 35%, con máis de 280 mil asalariados, un terzo do total, con contrato temporal. Varela insistiu en que estas cifras recurtan a calidade de vida dos cidadáns e son parte da explicación, entre outros, das baixas taxas de natalidade. Na súa opinión o feito de que Galiza teñan con eses números unha das taxas de temporalidade máis altas do Estado "supón un problema social que impide o desenvolvemento da sociedade galega".

"Non pode ser que un rapaz de 23 anos teña acumulados no seu caixón e nun ano até 15 contratos, como sucede en casos que coñecemos", criticou o conselleiro. Así e ao tempo que comentaba o detalle dos datos deste "Informe sobre a contratación temporal en Galiza", elaborado polo Instituto Galego das Cualificacións da Dirección Xeral de Formación e Colocación, Ricardo Varela anunciaba que a consellaría que lidera vai incentivar a contratación indefinida "e a transformación de contratos temporais en indefinidos a través de plans sectorias de estabilidade nos que se establezan mecanismos para detectar o fraude na contratación temporal".

A consellaría de Traballo buscará que estas medidas cheguen do consenso a través do diálogo social "por medio dun acordo tripartito a nivel de administración, organizacións empresariais e sindicatos". Mentres se lanza ese proceso negociador, para este 2006 Traballo deseñou xa incentivos que beneficiarán as empresas con taxas de estabilidade entre o seu persoal que superen o 70% e que privilexien os colectivos con máis problemas de inserción.