Vieiros

Os ecoloxistas apostamos polas enerxías renovábeis, pero nunca a costa de crear impactos inxustificados e inasumíbeis. Recoñecemos que Galiza poder ter capacidade para desenvolver aínda máis potencia eólica da que hoxe está instalada, pero ten que facerse con racionalidade, preservando os espazos protexidos e primando o aforro e a eficiencia enerxéticos sobre o negocio do despilfarro e a especulación. É por isto que temos solicitado da Consellería de Industria a que se inicie canto antes a revisión do Plan Enerxético, do Plan de Enerxías Renovábeis e, consecuente con estes, a revisión tamén do Plan Sectorial Eólico e demais plans sectoriais. Mentres tanto, debe de haber unha moratoria que permita non hipotecar a preservación dos espazos protexidos e o desenvolvemento racional destes Plans.

Dende a Federación Ecoloxista Galega, non se entende que a mesma Consellería de Industria, na que tamén se inclúe as competencias de Turismo, despreocúpase do mantemento da Paisaxe Natural Galega, cando é un dos atractivos que motivan ós visitantes achegarse a Galiza (como o sinala o último informe sobre o turismo no 2005 en Galiza e presentado polo señor Fernando Blanco a finais de decembro) e así o están a vender na Feira de Turismo (FITUR) a celebrar estes días.

Pouco queda do discurso de sostibilidade, nas que se pretendía crear menos parques eólicos e aumentar potencias dos existentes. Agora a Administración cede ante as empresas para seguir creando novos parques eólicos e logo aumentar a potencia. Así, as empresas seguen a aumentar os beneficios, mentres os veciños do entorno dos parques, poucos ou ningúns beneficio ou prestacións son os que reciben, pese ás promesas dadas polas Administracións e as empresas. E a nivel ambiental, son esquecidas as medidas ambientais unha vez autorizada a concesión.

Todos queremos máis, pero poucos teñen este dereito.