Vieiros

O líder do PPdeG vén de afirmar ao fío da reforma estatutaria en Cataluña que "o problema non é a palabra nación, senón os cartos". En entrevista concedida á axencia Europa Press, Alberte Núñez Feijoo referiuse moi criticamente ás posíbeis concesións en materia de financiamento que o goberno español podería facerlle aos cataláns para a continuación subliñar que en todo caso o PPdeG "tratará de acadar para o Estatuto de Galiza un marco competencial coma o de Cataluña". Así e todo, opinou que "sería un fracaso facer unha copia". Neste sentido Feijoo criticou que "a postura de Touriño on existe e será a que saia do Estatuto catalán". En todo caso, subliñou o seu desexo de "chegar a unha reforma pactada co PSdeG" engadindo que "sería bo que a ese acordo se sumase o BNG".

Ao respecto, o presidente da Xunta respondíalle nos micrófonos da Cadena Ser que o mesmo día que Feijoo fora escollido novo presidente do PPdeG xa lle trasladara a súa oferta para unha xuntanza inmediata e subliñou que "o diálogo non pode facerse cunha mentalidade partidaria, senón distinguindo ben a necesidade de buscarmos acordos de país". Touriño, que dixo estar seguro de que será máis doado chegar a acordos cun PP liderado por Feijoo fronte ao anterior con Manuel Fraga, comentou que o proceso de reforma estatutaria vaise iniciar formalmente o próximo mes de febreiro e asegurou que os partidos poderían acadar un consenso para esta reforma en 2006 podendo enviarlle proposta ao Congreso "antes de que remate o ano".

Sobre o mesmo asunto, o vicepresidente da Xunta afirmou que "Galiza xa perdeu tempo abondo" e lembrou que o BNG vén solicitando dar pasos para o diálogo desde longo tempo atrás malia que o PPdeG "se dese conta agora da necesidade de iniciar o proceso". Anxo Quintana dixo agardar que o ofrecemento dos populares non sexa "un brinde ao sol e sirva para iniciar un debate en serio sobre o papel que Galiza debe xogar no debate que se abriu no Estado".