Vieiros

A decisión da sala da Audiencia Nacional responde ao recurso presentado polo Concello de Salamanca, onde se demanda que o trafego dos documentos non se realizou conforme o procedemento que sinala a lei. Estaba previsto que a Audiencia non tomase unha decisión sobre a aceptación do recurso ata o luns, pero buliron e xuntáronse a deliberar na tarde do venres en relación coa medida cautelar que se solicitaba no recurso. O Concello fixera esta petición o mesmo día do traslado dos documentos, isto é, o xoves.

Os cinco xuíces da sala acordaron por unanimidade admitir o recurso municipal. A medida manterase cando menos ata o vindeiro martes, día para o que se fixou unha vista onde tanto o avogado do Concello salmantino coma o do estado en representación do Ministerio de Cultura exporán as súas alegacións sobre o trafego dos documentos. Logo da vista, a Audiencia decidirá se o traslado debe deterse ou pode continuar.

Os cinco maxistrados que adoptaron a decisión de paralizar o traslado son o presidente da Sección sétima do Contencioso, o burgalés José Luis López-Muñiz Goñi, membro da conservadora Asociación Profesional de la Magistratura, Begoña Fernández Dozagarat, Jaime Alberto Santos, Isabel Reza Gómez e María Dolores de Alba Romero. De forma paralela, o Tribunal Constitucional xa admitiu a trámite o día 20 o recurso interposto pola Junta de Castela e León contra a lei de devolución a Cataluña dos 'papeis de Salamanca' e pediu a opinión das partes sobre unha posíbel suspensión cautelar da mesma.

Tras coñecerse esta decisión, o ministro de Xustiza, Juan Fernando López Aguilar, non dubidou en afirmar que "o Goberno, coa máxima normalidade e coa máxima rapidez respostará xuridicamente". Fontes da dirección do PSOE sinalaron o seu "respecto polas decisións xudiciais" pero só será o Ministerio de Cultura o que se encargue de facer unha valoración oficial. Pola súa banda, o PSC afirmou que o traslado é "legal e confiamos en que así se recoñecerá". CiU dixo que a decisión "contribúe a enrarecer aínda máis o clima político". A consellaría de Cultura catalá valorará mañá a decisión da Audiencia.

Do outro lado, o Concello de Salamanca asegurou que isto demostra "a trapallada e a precipitación" con que o Goberno tratou desde o principio o tema. O voceiro municipal, Fernando Rodríguez, declarou que así se probaba a razón do Concello e expresou a "grande alegría e satisfacción" que lles produce esta noticia a "todos os salmantinos". Do mesmo xorne falou a conselleira de Cultura da Junta, Silvia Clemente, insisitindo en que, "á parte do atropelo e da urxencia con que sacaron as caixas do arquivo, non se está cumprindo nin sequera a lei" aprobada polo Parlamento a proposta do Goberno. A xuízo de Clemente, "a Audiencia Nacional comprobou o incumprimento da lei e dun xeito xusto adoptou este acordo, ao que, se lle engadimos a admisión do recurso polo Constitucional, fai que confiemos nos instrumentos do Estado de Dereito".