Vieiros

"A radiografía presentada é dunha extrema gravidade", comentou Touriño na súa intervención logo do consello da Xunta. A continuación afirmou que temporalidade "non debe ser sinónimo de competitividade e mellor produtividade empresarial, senón ao contrario" e insistiu na necesidade de "transmitirlle isto aos empresarios e sociedade en xeral". Nesa liña avanzou a vontade do bipartito de "chegar a "un gran pacto polo emprego, no que se asuman unhas liñas que permitan alterar o actual modelo económico".

O presidente da Xunta analizou que maior temporalidade "significa menor formación, menor estabilidade e identificación co proxecto empresarial e menor cualificación dos recursos humanos". Nese sentido, e dentro do proxecto do bipartito para crear un modelo "baseado no traballo estábel e de calidade" comentou que entre as medidas proxectadas están o incentivo de fórmulas de contratación que garantan o posto indefinido para o traballador e as penalizacións a aquelas que máis abusen da contratación temporal, o que pode incluír restriccións a estas empresas no acceso a axudas e e subvencións da administración galega.

O informe
Segundo o informe que o conselleiro de Traballo levou ao consello da Xunta deste xoves, só o 8,4% dos contratos no período 2000-2004 foron indefinidos. Por sectores, a maior contratación temporal está no sector servizos, especialmente no comercio e a hostalería. O sector da construción, o que ten maior porcentaxe de afiliación á seguridade social, amosa tamén taxa de ocupación temporal moi alta e as máis baixas aparecen no sector industrial. A taxa de ocupación temporal en Galiza quedou en 2004, último ano estudado, en 34.97%, medio punto por baixo da do ano anterior, 35.65%, malia que a nivel provincial, Lugo e Ourense amosaron un aumento de temporalidade. As taxas de emprego temporal foron en 2004 do 38.66% en Potnevedra, 38.22% na Coruña, 31.19% en Ourense e 27.16% en Lugo.