Vieiros

Subliñan os promotores do foro que é necesario coordinar esforzos para "enfrontar inimigos comùns coma son o capitalismo salvaxe, as hexemonías e dominacións que dan na explotación da xente e dos recursos", situacións que tan a miúdo teñen sufrido os africanos. Agárdase que a presencia do Foro Social Mundial en África, e a inercia mobilizadora que arrastra canda el, "axude a vermos as crecentemente dinámicas, vitais e progresistas potencialidades das sociedades do continente".

Cuestións coma a SIDA, as eivas na transparencia dos gobernos, a débeda externa e os acordos de libre comercio, as posibilidades do mantemento da paz por civís e o papel da intervención non violenta de terceiras partes en situcións de conflito e guerra, o problema da criminalización das migracións nos países desenvolvidos... Son algúns dos temas que contarán con roldas de debate concretas no Foro de Bamako, desde este xoves 18 e até o próximo 23 de xaneiro. De xeito específico, vaise tratar tamén o conflito do Sáhara occidental, "coma último problema de descolonización en África".