Vieiros

Esta primeira xuntanza chega ademais logo da polémica chamada desde o Parlamento galego a que os presidentes dos entes provinciais comparecesen na Cámara para explicar as contas das institucións que presiden, froito habitual de enfrontamento entre os partidos polo presunto desbalde e discrecionalidade no uso dos seus fondos. Lembrámoslles que a aquel convite só respondeu de xeito favorábel o socialista Salvador Fernández Moreda, presidente da Deputación coruñesa.

Nesta toma de contacto inicial entre goberno e deputacións, acadáronse malia todo acordos importantes, coma son o impulso dun grupo de traballo conxunto que será coordinado pola consellaría de Presidencia co obxetivo de facer un seguimento e poñer ao día as necesidades no ámbito competencial, financieiro e promover instrumentos de cooperación entre Xunta e deputacións. Ao tempo, decidiuse que Touriño se reúna cos presidentes provinciais cando menos dúas veces ao ano, para avaliar de xeito directo esta colaboración e fixouse nova xuntanza para antes do próximo verán.

"É preciso avanzar nunha liña na que as Deputacións Provinciais poidan xogar o papel de institucións complementarias ao servizo dos concellos e, en particular, dos pequenos concellos, para contribuír á súa mellora e modernización", apuntou o presidente da Xunta. De xeito concreto, falouse das necesidades de afrouxar peaxes nos contornos metropolitanos da Coruña e Vigo e artellouse unha comisión específica para o estudo de infraestruturas viarias.