Vieiros

"Un gran non fai graneiro", comentou o ministro de Defensa, José Bono, para os micrófonos de TVE, insistindo en que "probablemente non hai corporación en España que se acomodara tan puntualmente á hora constitucional tal e como o fixeron os exércitos". Bono esforzouse en cualificar de "puntual" a "indisciplina" de José Mena Aguado, número dous do exército de Terra, que no seu discurso en Sevilla con motivo da Pascua militar comentara que se os límites da Constitución "fosen sobrepasados sería de aplicación o artigo oitavo da Constitución: as Forzas Armadas (...) teñen coma misión garantir a soberanía e independencia de España, defender a súa integridade e o ordenamento constitucional". Bono insistiu ao respecto en que os militares deben ser "neutrais" e "non entrar na vida política".

Mentres, diversos medios recollen este martes a postura de colectivos militares en apoio das palabras de Mena. Así o fai un grupo de mandos retirados nunha misiva publicada por La Razón, onde advirten ademais que o goberno "sen dúbida tiña que coñecer perfectamente a través doutras instancias oficiais e moi especialmente dos Servizos de Intelixencia e Información do ministerio" deste estado de opinión nun sector do exército. No mesmo sentido vai a opinión manifestada desde a Asociación de Militares Españois, que recolle La Vanguardia, onde se cualifica de "dubidosa" a interpretación da Lei de Rexime Disciplinario a través da que se ordeou o arresto de Mena ao que gaban dicindo que "amosou a súa capacidade de antepoñer o interés xeral á mediocridade, cobardía e egoísmo".