Vieiros

"Dentro do marco europeo, e seguindo os preceptos da Carta europea de autonomía local do ano 1985, o eido local considérase xa como un piar fundamental no seu organigrama e motor indispensable de futuro", recolle o documento final ao respecto do Pacto Local redactado logo das achegas sucesivas desde a administración galega e da Fegamp. O texto fai referencia ao incremento no reparto de gasto acadado polos gobernos autonómicos, próximo ao 40%, e ao freo na capacidade de gasto dos Concellos, que queda no 13%.

A Xunta establecerá contías complementarias de 6 millóns de euros anuais entre 2006 e 2009 para o fondo de financiamento e o texto subliña ademais a necesidade de acadar "un pacto de Estado polo financiamento" para o que propoñen que se inclúan coma criterios "o número de núcleos de poboación e extensión do territorio". Ábrese a porta tamén á creación dun fondo de compensación interterritorial para os concellos máis desfavorecidos que tería o obxetivo de resolver "desequilibrios existentes en infraestruturas físicas, económicas e sociais". De xeito específico, chaman á participación das deputacións provinciais nesta tarefa para "garantir os principios de solidariedade e equilibrio intermunicipais".

Comisións de traballo entre consellarías e concellos
Goberno galego e concellos acordan tamén a posta en marcha dun conxunto de comisións paritarias a nivel de sete consellaría e máis vicepresidencia para o desenvolvemento de diversos proxectos. Así por exemplo, unha comisión mixta con representación de Fegamp e Medio Rural debatirá criterios para a cooperación sobre infraestruturas rurais; con Vivenda vaise traballar para a promoción de vivenda pública e solo industrial; con Industria falarase de enerxía eólica, turismo e áreas comerciais e con Cultura sobre a mellora de procedementos sobre patrimonio histórico.

O custo dos xulgados de paz, do mantemento dos centros de primaria, o fomento das agrupacións de concellos para o sostemento común de postos de funcionarios e servizos de arquitectura e urbanismo e o fomento de consorcios para a prestación de servizos de forma conxunta "en especial, augas, residuos e transportes", son outras achegas ao financiento por parte da Xunta subliñadas no documento.