Vieiros

Un total de 713.806 persoas están inscritas en Galiza no rexime xeral da Seguridade Social, un 4,45% máis ca no ano anterior, incremento que no que lle toca aos autónomos chegou ao 2,68%, deixando o total de afiliados en 183.736. Segundo os datos ofrecidos este martes pola consellaría de Traballo, só no agro se rexistrou un descenso na taxa interanual de afiliados, cunha redución do 6% no número de cotizantes, que queda en 56.935 persoas.

Malia isto, entre novembro e decembro de 2005 houbo unha diminución de 11.425 persoas nesa listaxe total de afiliados, especialmente significativo no caso da provincia de Pontevedra, onde a redución de cotizantes dun mes para o outro foi de 6.108 persoas. Ao respecto da evolución nese mesmo mes, lembran desde a UXT que o paro se incrementou nun 3,38%. Por sectores, o paro subiu principalmente na construción (10,7%), seguido da industria (6,55%) e o sector agrogandeiro (5,81%).

Emprego precario
"Seguimos estando nas porcentaxes de sempre. De preto de 800.000 contratos que se fixeron en Galiza, só o 8,8% son indefinidos", láiase o secretario xeral da CIG. Suso Seixo lembrou este martes ao fío das novas cirfas que esta situación "débese ter moi en conta de cara ao acordo para o emprego que se vai negociar co goberno da Xunta". Seixo pediu que se "adopten realmente un tipo de políticas que leven a que se modifique a precariedade do emprego que é de niveis moi altos e moi superiores á media europea".